Aldri før har så mange kunna gleda seg over dei mange arrangemanta under Festspillene i Bergen.
Festspillene i Bergen vert rekna for eit av årets aller mest fasjonable, med høgt kunstnerisk nivå og tilsvarande billettprisar. I år vert det annleis. Korona-situasjonen har snudd opp-ned på Kultur-Norge, såvel som på resten av landet.
I år kjem Festspillene verkeleg ut til folket. Du kan lasta ned arrangementa til din eigen sofa – heilt gratis.
Heile 60 ulike konsertar vil verta gjennomført utan publikum i salen. I staden vil arrangementa verta overført digitalt.
Aldri før har så mange sett Festspillene i Bergen. Dei to første dagane ha det blitt utført 141.000 strøymingar av arrangement, melder arrangøren.
Kveldes konsert med Mathias Eick – Kind of Blue – i Håkonshallen skulle også ha vore opningskonsert på årets Nattjazz. Heime i sofakroken kan vi leva oss inn i musikken – utan forstyrrande publikumssurr i bakgrunnen.
Arrangementa vert vist via Festspillene sine eigne heimesider og på sosiale medier. Einskilde konsertar vil og verta vist på andre kanalar.
Både opningskonserten og Einar Selvik sin konsert i Håkonshallen har vore populære. Det seier sitt om Festspillene sitt omdøme internasjonalt at berre vel 28 prosent av sjåarane er norske. I USA, Tyskland og Polen har Festspillene eit engasjert publikum.
