No eksploderer vikarutgiftene

Kostnadane til vikarar, ekstrahjelp og sjukeløn har gått til himmels dei tre første månadane som ny kommune.

Rekneskapen over variable lønskostnadar viser eit underskot på 17 millionar kroner så langt i år, kunne kommunalsjef for økonomi, Anne Erdal fortelja det utvida formannskapet i Øygarden i møtet i dag.

Underskotet kjem etter at ein optimistisk posisjon i forventning om store effektiviseringar i ein samanslått kommune, vedtok å redusera posten for vikarbruk og sjukeløn med 20 millionar kroner i budsjettdebatten før årsskiftet.

Så langt har ikkje dei forventa effektiviseringane slått inn. For å kunna fylla dei tomme hola i vaktplanane, og tilby øygardsstrilane dei tenestene dei forventar innan helse, omsorg og oppvekst, måtte kommunen ut med variable lønskostndar på til saman 53,9 millionar kroner i første kvartal, viser rekneskapen. Det er 17 millionar kroner meir enn budsjettert, ifølgje Erdal.

Dåverande ordførar i Fjell, Marianne Sandahl Bjorøy (A), åtvara i budsjettdebatten sterkt om at eit for sterkt forventningspress til effektiviseringar kom til å gå ut over helse og arbeidsmiljø hos dei tilsette.

Les: Uroleg for dei tilsette

Erdal lovar at ho no vil ta grep ovanfor dei einskilde einingsleiarane for å få kontroll på dei variable lønskostnadane.