Tre kriser på ein gong råkar næringslivet i Øygarden hardt.
Koronakrise, oljeprisfall og rekordlåg norsk krone. Samanfallet av tre globale kriser råkar det lokale næringslivet hardt. Over 2.200 øygardsstrilar er no registrert som arbeidslause. Fleisteparten er permitterte, ifølgje NAV.
Les: I denne bransjen er flest ramma
Dramatisk
Fleire av dei permitterte har grunn til å frykta å verta oppsagte i nær framtid. Dagleg leiar Rikard Toft Ledang i Vest Næringsråd karakteriserer situasjonen som dramatisk i ei pressemelding.
Fire prosent av medlemsverksemdene til Vest Næringsråd opplyser at dei alt har gjennomført oppseiingar. Ytterlegare åtte prosent reknar med at det vil skje, ifølgje Ledang.
Kritisk for sju av ti
Ni av ti medlemsverksemder i Vest Næringsråd opplever den noverande situasjonen som alvorleg. Varer situasjonen i ytterlegare to til tre månadar, vil situasjonen vera kritisk for sju av ti verksemder, ifølgje ei undersøking utført av Næringsalliansen i Hordaland og Sogn og Fjordane Næringsråd. 87 av medlemsverksemdene i Vest Næringsråd har svart.
Meir enn halvparten av medlemsverksemdene i Vest Næringsråd har gjennomført permitteringar. Ytterlegare 26 prosent reknar med at dei kan verta nøydde til å gjera det.
Konkurs
Kva fjerde verksemd står i fare for å gå konkurs dersom situasjonen varer over lengre tid. For fire prosent av verksemdene tilseier situasjonen at konkurs kan vera nær føreståande.
-Om nokon går konkurs, vil det visast att på arbeidsledighets-statistikken også etter at krisa er over, seier Ledang.
Innovasjon
I håp om å motverka situasjonen oppmuntrar leiaren for Vest Næringsråd til lokal innovasjon og gründersatsing.
Tiltakspakke
Undersøkinga, saman med kommentarane og forslaga frå dei einskilde verksemdene, gjev Vest Næringsråd eit godt grunnlag for å bidra når Øygarden kommune seinare i vår skal vedta ein lokal tiltakspakke, ifølgje Ledang.
