Arbeidsløysa har passert 10 prosent

Heile 2.321 Øygardsstrilar er no utestengt frå arbeidslivet.

Talet på ledigmelde har eksplodert siste to vekene som følgje av korona-tiltaka. I Vestland er det no 40.700 ledige. 33.738 av dei er heilt ledige, ifølgje NAV.

-Alle bransjar blir råka. Samfunnet er stengt ned, og det får konsekvensar over alt, seier Anne Kverneland Bogsnes, direktør i NAV Vestland.

2.177 av dei heilt ledige er heimehøyrande i Øygarden. Det er heile 1.627 fleire enn for to veker sidan, og meir enn ei dobling berre samanlikna med sist veke.

I Vestland er 16.086 av dei heilt ledige permitterte. Det vert ikkje opplyst kor mange av dei ledige i Øygarden som er permittert.

Dei ledige er omlag likeleg fordelt mellom kjønna.

Les: Korona-effekten lammar arbeidslivet

Dei heilt ledige tilsvarar 10,7 prosent av den lokale arbeidstyrken. I tillegg kjem 141 personar på tiltak og ei rekkje delvis ledige.

Talet på ledige aukar dag for dag. Berre i går mottok NAV Vestland 2.014 nye søknadar om dagpengar.

Det er flest ledige innan butikk -og salsarbeid (5.906), reiseliv og transport (5.402) og serviceyrke
(4.024), medan det er færrast ledige innan jordbruk, skogbruk og fiske (184), akademiske yrke
(344) og undervisning (736).