Undervegs mot Rubbegarnståna

Svartstilla og neglesprett prega første etappen av Nye Øygarden Rundt.

Laila Reigstad og Cato Risløw fekk ein draumestart på første etappen av Nye Øygarden Rundt. Etter ein stopp på Rong for å helsa på avtroppande ordførar Børge Haugetun nærmar dei seg no Rubbegarnståna fyr der dei skal setja kursen vestover ut i Nordsjøen.

Les: Planlegg ekstrempadling – Nye Øygarden Rundt i romjula

Starten på Straume grytidleg 2. juledag skjedde i vindstille opphaldsvêr. Dei første 20 kilometrane nordover Hjeltefjorden gjekk unna raskare enn planlagt, med straumen bakanfrå og ein fart på 6,3 kilometer i timen, kunne ei smilande Laila fortelja nettavisa Tunnelsyn.

Tre grader i lufta og kald sjø gjer imidlertid at det vert kaldt på hendene, la ho til.

Planen er å padla dei 150 kilometrane rundt Nye Øygarden på tre dagar. Vêrmeldinga for dei komande dagane varslar aukande vindstyrke og regnbyger. Det er alt no klart at dei kjem til å ta inn til Kjereidet og padla gjennom Kørelen til Eide, istaden for å leggja turen rundt Golta, seier Reigstad.