Det var mange som trippa utolmodig før Sotra Hagelag opna salet under årets planteloppemarknad.
Mellom dei godbitane som gjekk aller først var to store peonrøter til 50 kroner, fortel Mary-Ann Golten i Sotra Hagelag til nettavisa Tunnelsyn.no.
Planteloppemarknaden på Sotratrappa har blitt ein tradisjon. Små og store hageeigarar og balkongkassedyrkarar kan her finna breidt utval til å utvida den heimlege floraen.
Nyttevekstar, stauder, stiklingar til fjellhagen og prydbuskar i fleire storleikar gjekk fort unna.
-Det er utruleg inspirerande at folk kjem hit og kjøper plantar. Og det er hyggeleg å kunna selja rimeleg. Her kan folk få meir for pengane, reklamerer Golten.
