Sotratrøya – den originale

Den opphavelege Sotra-trøya vart nytta både til kvardag og fest – heile døgnet. Tunnelsyn kan no visa bilete av ein tidleg variant av trøya.

Saka om ”Stjernetrøya frå Sotra”, har blitt svært mykje lese og delt av Tunnelsyn sine lesarar. Slik fekk også den utflytta fjellsokningen Martha Nordland frå Brattholmen kjennskap til arbeidet med å gje det tradisjonsrike strikkaplagget ein renessanse.

Breidt kvitt brot
Den tidlege Sotratrøya var strikka i ubleika kvitt og brunt, og hadde knappestolpe og breidt kvitt brot nede på bolen, viser bileta som Nordland har funne i ein artikkel i Norsk Husflid frå 1984.

Det breie kvite brotet vart stukke ned i vadmelsbuksa, og varmde sikkert godt.

Takka vera Martha Nordland kan Tunnelsyn no visa bilete av ein tidleg variant av plagget.

Allsidig bruk
Trøya var eit stasplagg og vart nytta til fest, viser bileta i artikkelen. Men bruken må ha vore svært allsidig, skal vi tru namngjevinga. Trøya vart nemleg også kalla ”natt-trøye”, i følgje Marie Fjereide som skreiv artikkelen i husflidsbladet.

Trøya artikkelen refererte til var den gongen i ein liten privat samling.

Nedanfor kan du lesa artikkelen i Norsk Husflid.